"Kailangang iligtas sina Bonifacio sa kinasadlakan nilang altar. Ang higit sanang nararapat, kailangang sagipin ang Katipunan sa pasiklot-siklot na alon ng pagsipat sa kasaysayan nitong nakaraang sandaang taon. Sa ating wika, si Bonifacio, si Jacinto, at ang Katipunan ay iisa.

"Noon pang 1903, kinondena ni Mabini ang mga asesino ni Bonifacio. Ikatwiran man daw na isang lunas ang pagpatay sa Supremo tungo sa pagkakaisa ng Rebolusyong Filipino, isang krimen iyon at maituturing na "unang tagumpay ng makasariling adhikain sa tunay na pagkamakabayan." Para kay Mabini, biktima si Bonifacio bilang Supremo ng tatawagin ni Nick Joaquin na "Cavitismo." Ngunit si Bonifacio bilang awtor ay sinimulang patayin pagkalibing kay Mabini at patuloy na pinapatay sa kabila ng mga bantayog at pagdangal sa kanya bilang Ama ng Himagsikan."

Published in 1993 by Cultural Center of the Philippines

Paperback